کویت اردو نیوز : آئی سی سی ورلڈ کپ 2023 کا پہلا سیمی فائنل کل بھارت اور نیوزی لینڈ کے درمیان ممبئی میں کھیلا جائے گا لیکن بارش کی وجہ سے مقررہ دن کے بعد ریزرو ڈے پر بھی میچ ختم نہ ہوسکا تو کیا ہوگا؟
Accuweather کے مطابق بدھ کو ممبئی میں دھوپ ہوگی اور میچ کے دوران بارش کا کوئی امکان نہیں ہے۔ ایسے میں شائقین کو پورا 100 اوورز کا میچ دیکھنے کو ملے گا لیکن اگر میچ کے دوران بارش ہو بھی جائے تو شائقین کو پریشان ہونے کی ضرورت نہیں کیونکہ آئی سی سی نے ایک دن ریزرو میں رکھا ہے۔
انٹرنیشنل کرکٹ کونسل کی جانب سے مقرر کردہ پلیئنگ کنڈیشنز کے مطابق سیمی فائنل اور فائنل میچز میں ہر ایک کو 120 منٹ کا اضافی وقت دیا جائے گا تاہم اگر مقررہ دن کوئی میچ بے نتیجہ رہا تو ریزرو ڈے کھیلا جائے گا۔ اگر ریزرو ڈے پر بھی نتیجہ نہ نکلا تو پوائنٹس ٹیبل میں بہتر پوزیشن رکھنے والی ٹیم فائنل میں پہنچ جائے گی۔
اس کا مطلب یہ ہے کہ اگر بارش نے سیمی فائنل میں میچ کے دن اور ریزرو ڈے دونوں پر کھیل خراب کیا تو ہندستان اور جنوبی افریقہ اپنے حریفوں کے مقابلے پوائنٹس ٹیبل میں بہتر کارکردگی کی بنیاد پر فائنل میں پہنچ جائیں گے۔
پوائنٹس ٹیبل میں بھارت پہلے، نیوزی لینڈ چوتھے، جنوبی افریقہ اور آسٹریلیا بالترتیب دوسرے اور تیسرے نمبر پر ہیں۔
واضح رہے کہ آئی سی سی ورلڈ کپ کا پہلا سیمی فائنل بدھ کو میزبان بھارت اور نیوزی لینڈ کے درمیان کھیلا جائے گا جب کہ دوسرا سیمی فائنل جمعرات کو آسٹریلیا اور جنوبی افریقہ کے درمیان کھیلا جائے گا۔ میگا ایونٹ کا فائنل اتوار 19 نومبر کو احمد آباد میں ہوگا۔