کویت اردو نیوز : ( پاکستان) نگراں وزیر برائے مذہبی امور انیق احمد آج حج پالیسی 2024 کا اعلان کریں گے۔
گزشتہ روز وفاقی کابینہ نے حج پالیسی 2024 میں ترامیم کی منظوری دی تھی جس کے تحت 2024 میں 179,210 پاکستانی حج کی سعادت حاصل کریں گے۔
حج پالیسی کے تحت سرکاری اور پرائیویٹ سکیموں کا غیر استعمال شدہ اسپانسر شپ کوٹہ حکومت سعودی عرب کو واپس کر دیا جائے گا۔ حج گروپ آرگنائزرز کے مالیاتی انتظامات کے حوالے سے فول پروف مانیٹرنگ سسٹم کانفاذبھی عمل میں لایاجائےگا۔
نئی حج پالیسی میں حج آرگنائزر کمپنیوں کے تحفظات دور کر دیے گئے ہیں جس کے مطابق 10 سال سے کم عمر کے بچے بھی فریضہ حج ادا کر سکیں گے۔
پرائیویٹ حج سکیموں میں 80 سال سے زائد عمر کے افراد کے لیے ساتھی کی شرط میں نرمی کی جائے گی۔
حج گروپ کے منتظمین سعودی عرب میں قیام کے دوران مقامی معاونین کی خدمات حاصل کرنے کے لیے حاجی کے ساتھ معاہدہ کریں گے۔ اس پوائنٹ کی خلاف ورزی پر حج گروپ آرگنائزر کو جرمانہ اور بلیک لسٹ کیا جا سکتا ہے۔
نئی پالیسی کے مطابق ہارڈ شپ حج کوٹہ کم کیا جا رہا ہے۔ سعودی عرب کی مقامی یونیورسٹیوں میں زیر تعلیم پاکستانی طلبہ کے لیے مقامی معاونین کا 50 فیصد کوٹہ مختص کیا جائے گا، ان طلبہ کو فلاحی عملے کے طور پر تعینات کیا جائے گا۔