کویت اردو نیوز : دماغی تنزلی عمر کے ساتھ ساتھ تیز ہوتی جاتی ہے، لیکن آپ چند آسان کاموں سے اسے روک سکتے ہیں اور اپنے دماغ کو جوان رکھ سکتے ہیں۔
ہمارے دماغ کو اپنا کام کرنے کے لیے بہت زیادہ ایندھن کی ضرورت ہوتی ہے اور تحقیقی رپورٹس کے مطابق دماغ دن بھر کھانے سے حاصل ہونے والی کیلوریز کا 20 فیصد استعمال کرتا ہے۔
اگر آپ عمر کے ساتھ دماغی افعال کو درست اور یادداشت کو مستحکم رکھنا چاہتے ہیں تو چند مشروبات کا استعمال مددگار ثابت ہوسکتا ہے۔
تو جانیے ان مشروبات کے بارے میں جو دماغ کے لیے بہت فائدہ مند ہیں۔
کافی
کافی میں موجود کیفین نہ صرف دماغ کو چوکنا رکھتا ہے بلکہ ارتکاز میں بھی مدد کرتا ہے اور موڈ کو بھی بہتر بناتا ہے۔ تحقیقی رپورٹس کے مطابق کافی کا معتدل استعمال فالج اور الزائمر کے مرض کا خطرہ کم کرتا ہے۔
سبز چائے
سبز چائے میں بھی کیفین کی کچھ مقدار ہوتی ہے اور کافی کی طرح یہ چائے بھی دماغ کو متحرک کرتی ہے۔
تحقیقی رپورٹس میں دریافت کیا گیا ہے کہ سبز چائے میں موجود مرکبات یادداشت اور ارتکاز کو بہتر بناتے ہیں۔ ماہرین کے مطابق سبز چائے دماغی صحت کے لیے فائدہ مند ہے۔
ہلدی کی چائے
ہلدی کا استعمال کھانا پکانے میں کیا جاتا ہے لیکن اسے چائے کا ذائقہ بڑھانے کے لیے بھی استعمال کیا جا سکتا ہے۔ ہلدی سوزش کو دور کرنے والی سمجھی جاتی ہے جبکہ اس کے استعمال سے جلد، جوڑوں اور نظام ہاضمہ کو بھی فائدہ ہوتا ہے۔ سوزش کی روک تھام دماغی افعال کو بہتر بناتے ہوئے الزائمر کی بیماری کے خطرے کو کم کرتی ہے۔ یہی وجہ ہے کہ تحقیقی رپورٹس اس بات کا جائزہ لے رہی ہیں کہ ہلدی دماغ کو کس حد تک فائدہ پہنچاتی ہے اور یادداشت بہتر کرتی ہے۔