کویت اردو نیوز : قطر میں سزائے موت پانے والے بھارتی بحریہ کے 8 سابق اہلکاروں کی سزا کو قید میں تبدیل کر دیا گیا۔ ان اہلکاروں پر اسرائیل کے لیے جاسوسی کا الزام تھا۔
بھارتی بحریہ کے اہلکاروں کی اپیل پر فیصلہ سناتے ہوئے قطر کی عدالت نے ان کی سزائے موت کو تبدیل کرتے ہوئے انہیں جیل بھیج دیا ہے۔
فیصلہ سنائے جانے کے وقت آٹھ سابق فوجیوں کے اہل خانہ اور بھارتی سفیر بھی عدالت میں موجود تھے۔
بھارتی وزارت خارجہ نے ایک بیان میں کہا کہ تفصیلی فیصلے کا انتظار ہے۔ ہم اگلے اقدامات کا فیصلہ کرنے کے لیے قانونی ٹیم کے ساتھ ساتھ خاندان کے ساتھ قریبی رابطے میں ہیں۔
بیان کے مطابق ’قطر میں ہمارے سفیر اور دیگر حکام اہل خانہ کے ہمراہ آج اپیل کورٹ میں موجود تھے‘۔ ہم اس معاملے کے آغاز سے ہی ان کے ساتھ کھڑے ہیں اور قانونی مدد فراہم کرتے رہیں گے۔ ہم اس معاملے کو قطری حکام کے ساتھ اٹھاتے رہیں گے۔
مزید کہا گیا ہے کہ معاملے کی کارروائی کی خفیہ اور حساس نوعیت کی وجہ سے اس موقع پر مزید تبصرہ کرنا مناسب نہیں ہوگا۔
ہندوستانی بحریہ کے ان سابق اہلکاروں کو اکتوبر میں قطر کی ایک عدالت نے موت کی سزا سنائی تھی۔ بھارت نے نومبر میں ایک اپیل دائر کی تھی جس میں فیصلے کو "بہت حیران کن” قرار دیا گیا تھا۔
دہراء گلوبل دوحہ کے ان تمام ملازمین کو اگست 2022 میں حراست میں لیا گیا تھا۔ قطری حکام کی جانب سے ان پر لگائے گئے الزامات کو منظر عام پر نہیں لایا گیا۔ تاہم فنانشل ٹائمز کی ایک رپورٹ کے مطابق ان پر اسرائیل کے لیے جاسوسی کا الزام لگایا گیا تھا۔
ان الزامات کے حوالے سے بھارت کی جانب سے کوئی سرکاری بیان سامنے نہیں آیا ہے۔
قطری عدالت کے اس فیصلے کو بھارت کی بڑی کامیابی قرار دیا جا سکتا ہے۔
