کویت اردو نیوز : امریکہ میں ایک کتا گھر میں رکھے گیارہ لاکھ روپے مالیت کے ڈالر کھا گیا ۔
امریکی ریاست پنسلوانیا میں ایک انوکھا واقعہ پیش آیا جہاں پالتو کتے نے مالک کے چار ہزار ڈالر کھا لیے، پاکستانی روپے میں یہ رقم 11 لاکھ 26 ہزار روپے سے زائد بنتی ہے۔
یہ واقعہ اس طرح پیش آیا کہ دسمبر کے اوائل میں پٹسبرگ شہر کے رہائشی کلیٹن نے اپنے کچن میں ایک لفافہ رکھا جس میں چار ہزار امریکی ڈالر تھے، جس کی رقم سے وہ باڑ بنانے جا رہا تھا۔
کچن کے کاؤنٹر پر پیسے رکھنے کے چند منٹ بعد لفافہ ان کے پالتو کتے کے منہ میں تھا اور جب تک وہ اسے پکڑنے میں کامیاب ہوئے تو کتا ڈالر کھا چکا تھا۔
مقامی میڈیا کے مطابق گھر کے مالک کلیٹن اور ان کی اہلیہ کیری لا نے سیسل نامی کتے کی قے اور دیگر ٹکڑوں کو اکٹھا کیا اور انہیں ٹیپ سے باندھ دیا تاہم 450 ڈالر کا نقصان ہو چکا تھا ۔
سیسل کا معائنہ کرنے والے ڈاکٹر نے جوڑے کو بتایا کہ ان کا کتا ٹھیک ہو جائے گا۔
اس وقت جب کتے نے 4 ہزار ڈالر کا لفافہ ہڑپ کر لیا تو مالکان بہت پریشان تھے لیکن اب وہ پالتو کتے کے اس فعل سے محظوظ ہو رہے ہیں اور اس بارے میں مختلف میڈیا کو انٹرویو بھی دے چکے ہیں۔