قطر سے بھارتی اہلکاروں کی رہائی کا سہرا شاہ رُخ کے سر سج گیا

کویت اردو نیوز: راجیہ سبھاکےسابق رکن پارلیمنٹ سبرامنیم سوامی نے قطرمیں جاسوسی کےالزام میں گرفتاربھارتی بحریہ کے 8 افسران کی رہائی کا سہرا بالی ووڈ کے کنگ خان شاہ رخ کو دیا۔

سبرانیم سوامی نے دعویٰ کیا ہے کہ شاہ رخ خان نے قطر کی حکومت کو افسران کو رہا کرنے پر راضی کرنے میں مدد کی۔

راجیہ سبھا کے سابق رکن پارلیمنٹ سبرامنیم سوامی نے 13 فروری بروز منگل کو آفیشل ایکس ہینڈل وزیر اعظم نریندر مودی کی پوسٹ کو دوبارہ پوسٹ کیا، جس میں ہندوستانی وزیر اعظم کے یو اے ای اور قطر کے دورے کا ذکر کیا گیا۔

مودی نے لکھا تھا کہ ‘میں مختلف پروگراموں میں شرکت کے لیے دو دن میں متحدہ عرب امارات اور قطر کا دورہ کروں گا، جس سے ان ممالک کے ساتھ باہمی تعلقات مزید گہرے ہوں گے۔ وزیر اعظم کا عہدہ سنبھالنے کے بعد یہ میرا متحدہ عرب امارات کا ساتواں دورہ ہوگا، جو اس بات کی نشاندہی کرتا ہے کہ ہم مضبوط ہندوستان-یو اے ای دوستی کو ترجیح دیتے ہیں۔

اس پر سبرامنیم سوامی نے لکھا کہ ‘مودی شاہ رخ خان کو اپنے ساتھ قطر لے جائیں کیونکہ وزارت خارجہ اور این ایس اے قطری شیخوں کو راضی کرنے میں ناکام رہے، مودی نے شاہ رخ سے مداخلت کی درخواست کی اور اس طرح ہماری بحریہ کے افسران کی رہائی کے لیے قطری شیخوں سے مہنگا سودا کرلیا۔

بھارتی حکام کی رہائی میں شاہ رخ کے کردار کا دعویٰ جیسے ہی سوامی کی جانب سے سامنے آیا، اداکار کی سوشل میڈیا پر واہ واہ شروع ہو گئی۔

تاہم بالی ووڈ اداکارشاہ رخ کیجانب سے ایسے دعوؤں کی تردید کی گئی ہے۔

شاہ رخ خان کی جانب سے ان کی منیجر پوجا دلانی گرنانی نے آفیشل انسٹاگرام پر ایک بیان شیئر کیا۔

بیان کیمطابق اس کیس میں شاہ رخ کےملوث ہونےکے دعوےبےبنیاد ہیں۔ بھارتی اہلکاروں کی رہائی کاسہرا مکمل طورپربھارتی سرکاری اہلکاروں کوجاتا ہے۔

بیان میں مزید کہا گیا ہے کہ سفارت کاری سے متعلق تمام معاملات انتہائی قابل رہنما بہترین طریقے سے انجام دیتے ہیں، دیگر ہندوستانیوں کی طرح، شاہ رخ بھی خوش ہیں کہ بحریہ کے افسران گھر پر محفوظ ہیں اور اداکار ان کے لیے نیک خواہشات کا اظہار کرتے ہیں۔ .

شاہ رخ خان حال ہی میں قطر میں اے ایف سی فائنل کے مہمان خصوصی کے طور پر موجود تھے، ان کے ایک فین پیج نے اداکار کی قطر کے وزیر اعظم محمد بن عبدالرحمن بن جاسم الثانی کا استقبال کرنے کی تصویر شیئر کی۔

اس تصویر کو بھارتی حکام کی رہائی میں شاہ رخ کے کردار کے لیے پروپیگنڈے کے طور پر استعمال کیا گیا۔