کویت اردو نیوز، 5 مئی: دبئی کی ایمریٹس اور اتحاد ایئرویز نے معاہدہ کر لیا جس کے تحت مسافر سنگل ٹکٹ کے ذریعےایک سے زائد مقامات سے لطف اندوز ہو سکیں گے۔
مؤقر انگریزی جریدے کے مطابق معاہدے کا بنیادی مقصد ملک میں سیاحت کو فروغ دینا ہے، معاہدے کے تحت مسافر دبئی یا ابوظبی کے لیے سنگل ٹکٹ بک کر سکیں گے اور کسی دوسرے ایئرپورٹ سے واپس آ سکیں گے۔
معاہدے کے تحت مسافروں کو یہ اختیار حاصل ہو گا کہ وہ اپنی سہولت کے تحت اپنے سفر کا پلان بنا سکیں۔
ایمریٹس کے صدر ٹِم کلارک نے اس حوالے سے کہا کہ ہمیں اتحاد ایئرویز کے ساتھ دوبارہ کام کر کے خوشی ہو رہی ہے۔
دونوں ایئرلائنز یو اے ای آمد اور روانگی کے لیے بہترین آپشن دے رہی ہیں جس سے سیاحت کو فروغ ملے گا۔
ابتدائی طور پر اس معاہدے کے تحت یورپ اور چین سے آنے مسافروں کو سہولتیں دی جائیں گی۔
میڈیا رپورٹ کے مطابق اتحاد ایئرویز کے سی ای او انتونو آلڈو نے کہا ہے کہ ہمارے معاہدے سے مسافروں کو سہولت ہو گی کہ وہ ایک ٹکٹ پر دبئی اور ابوظبی کے سفر سے لطف اندوز ہو سکیں، مسافروں کے لیے یہ ہر لحاظ سے بہترین آپشن ہے۔
معاہدے پر جمعرات کو ایمریٹس کے چیف کمرشل آفیسر عدنان کاظم اور اتحاد کے چیف آپریٹنگ آفیسر محمد البلوکی نے دبئی میں دستخط کیے
