کویت اردو نیوز،18جولائی: پاکستان کی میزبانی میں ہونے والے ایشیا کپ سے متعلق معاملات کو حتمی شکل دے دی گئی۔ اس ضمن میں ایشیا کپ سے متعلق دبئی میں ہونے والے اجلاس میں پاکستان کرکٹ بورڈ، ایشی کرکٹ کونسل اور سری لنکا کرکٹ کے عہدیداروں نے شرکت کی۔
ذرائع کا بتانا ہے کہ ایشیا کپ سے متعلق معاملات کو حتمی شکل دے دی گئی ہے، تفصیلات کا اعلان جلد متوقع ہے۔
ذرائع کا کہنا ہے کہ پاکستان میں ایشیا کپ کے چار میچز ہی کھیلے جائیں گے، پاکستان میں میچز دو وینیوز پر کھیلے جانے کا امکان ہے۔
ذرائع کا بتانا ہے کہ دبئی میں ہونے والے اجلاس میں براڈ کاسٹنگ کے معاملات پر تفصیلی بات ہوئی، میٹنگ میں ٹیموں کے آنے جانے اور دیگر معاملات پر بھی تفصیلی گفتگو ہوئی۔
ذرائع کے مطابق ایشین کرکٹ کونسل ایشیا کپ کے شیڈول اور وینیوز کا باضابطہ اعلان کرے گا۔
ایشیا کپ پاکستان میں 31 اگست سے شروع ہوگا جو 17 ستمبر تک کھیلا جائے گا، ایشیا کپ میں پاکستان سمیت بھارت، سری لنکا، بنگلادیش، افغانستان اور نیپال کی ٹیمیں حصہ لیں گی۔
ایشین کرکٹ کونسل کا کہنا ہےکہ ٹورنامنٹ ہائبرڈ ماڈل کے تحت کھیلاجائے گا جس میں ایونٹ کے چار میچز پاکستان اور 9 میچز سری لنکا میں ہوں گے۔
