کویت اردو نیوز ، 3 اکتوبر 2023: محققین کے مطابق اگر آپ دماغی طور پر صحتمند رہنا چاہتے ہیں تو پھر مچھلی کے شکار کو اپنا مشغلہ بنالیں۔
محققین نے یہ نتیجہ ایک تحقیق سے اخذ کیا ہے جس میں 17 سو سے زیادہ مردوں نے حصہ لیا۔
مردوں کی ذہنی صحت پر فشنگ کے اثرات کو جانچنے کیلئے یہ تحقیق برطانیہ کی اینگلیا رسکن یونیورسٹی، کوئنز یونیورسٹی اور السٹر یونیورسٹی کے محققین نے مشترکہ طور پر انجام دی ہے۔
تحقیق کے دوران 1752 مردوں سے مچھلی کے شکار پر جانے اور دیگر مختلف موضوعات جیسے ماضی میں کوئی دماغی مرض، صحت اور ورزش سے متعلق سوالات پوچھے گئے۔
تحقیقی مطالعے کے وہ شرکاء جو کہتے تھے کہ وہ باقاعدگی سے مچھلی کے شکار پر جاتے ہیں، ان کے کسی نفسیاتی یا ذہنی مرض میں مبتلا ہونے کی شرح مچھلی کا باقاعدگی سے شکار نہ کرنیوالے افراد کے مقابلے میں 17 فی صد کم تھی۔
چند ہفتے پہلے ایک سائنسی جریدے میں شائع ہونے والی اس تحقیق میں بتایا گیا ہے کہ جو لوگ جتنا زیادہ مچھلی کے شکار پر جاتے ہیں ان کی ذہنی صحت اتنی ہی بہتر ہوتی ہے۔
یونیورسٹی آف کوئنزلینڈ میں سینٹر فار ہیلتھ ریسرچ سے تعلق رکھنے والے ڈاکٹر مائیک ٹروٹ، جو کہ خود بھی اس اسٹڈی کا حصہ تھے،کہتے ہیں کہ اگرچہ یہ طے شدہ بات ہے کہ مثبت مشاغل انسان کی ذہنی اور جسمانی صحت پر اچھے اثرات مرتب ہوتے ہیں تاہم اس تحقیق سے یہ بات سامنے آئی ہے کہ مچھلی کے شکار پر اکثر و بیشتر جانے والے لوگ دیگر لوگوں کی نسبت ذہنی طور پر زیادہ صحتمند ہوتے ہیں۔
ڈاکٹر مائیک ٹروٹ نے کہا کہ ان لوگوں کے ذہنی انتشار ، ڈپریشن اور دیگر ذہنی امراض میں مبتلا ہونے کے امکانات کم ہوتے جاتے ہیں اور ان کو خودکشی کے خیالات بھی نہیں آتے۔
