کویت اردو نیوز ، 19 اکتوبر 2023: بھارتی ریاست آندھرا پردیش میں ایک خاتون کی پولیس اسٹیشن میں تالے لگانے کی تصویر نے سوشل میڈیا صارفین کو چونکا دیا ہے۔
میڈیا رپورٹس کے مطابق وشاکھاپٹنم ضلع کی رہائشی گوتمی نے حال ہی میں ایک اپارٹمنٹ کمپلیکس میں 15 لاکھ روپے میں ایک فلیٹ خریدا ہے۔ خاتون نے 5 لاکھ روپے ایڈوانس اور اس کے لیے کچھ قسطیں ادا کیں۔
تاہم گھر کے مالک نے یہ دعویٰ کرتے ہوئے کہ گوتمی نے اسے کوئی رقم نہیں دی تھی، خاتون کا سامان سڑک کے بیچ میں پھینک دیا۔ خاتون نے اس معاملے میں انصاف کے لیے پنڈورتی تھانے سے رجوع کیا اور مالک مکان کے خلاف شکایت درج کرائی۔
کئی دن گزرنے اور گوتمی کے بار بار چکر لگانے کے باوجود جب پولس نے اس معاملے میں کوئی دلچسپی نہیں دکھائی تو خاتون نے گھر سے تالا اٹھا کر تھانے کے مین گیٹ پر تالا لگا دیا۔
پولیس اسٹیشن کو لاک کرتے ہوئے خاتون کی تصویر مختلف سوشل میڈیا پلیٹ فارمز پر گردش کر رہی ہے۔
