کویت اردو نیوز : متحدہ عرب امارات میں چوری شدہ کریڈٹ کارڈ ڈیٹا کی آن لائن فروخت کا سکینڈل سامنے آیا ہے۔
دبئی حکام نے چوری شدہ کریڈٹ کارڈز خریدنے والے ایک غیر ملکی کو جیل کی سزا کاٹنے کے بعد ملک بدر کر دیا۔
ایمریٹس الیوم کے مطابق، اس اسکینڈل کا انکشاف اس وقت ہوا جب ایک یورپی شہری نے دبئی میں ای کرائم پورٹل کے ذریعے بینک سے اپنا کارڈ عارضی طور پر بلاک کرنے کی درخواست کی۔
یورپی شہری کا کہنا تھا کہ ‘میں اس وقت حیران رہ گیا جب مجھے موبائل کریڈٹ کارڈ کے ذریعے 2088 درہم کی آن لائن شاپنگ کا پیغام ملا۔
ایس ایم ایس موصول ہونے پر، میں نے بینک سے رابطہ کیا اور کارڈ کو معطل کرنے کی درخواست کی۔
دبئی پولیس کے تحت انسدادِ جرائم کے ماہرین نے ایک ایسے عرب شہری کی نشاندہی کی ہے جس نے یورپی شہری کا کریڈٹ کارڈ ڈیٹا استعمال کیا۔ ملزم کو گرفتار کرکے پبلک پراسیکیوشن کےحوالے کردیاگیا۔
عرب شہری نے عدالت میں موقف اختیار کیا کہ اس نے کارڈ کا ڈیٹا آن لائن حاصل کیا تھا۔ ایک کارڈ کا ڈیٹا 15 ڈالر میں فروخت کیا جا رہا ہے۔
عدالت نے ملزم کو مسروقہ رقم واپس کرنے اور مساوی جرمانہ ادا کرنے پر ایک ماہ قید کی سزا سنائی۔عدالت نے سزا پوری کرنے کے بعد انہیں بے دخل کرنے کا حکم بھی جاری کیا تھا۔
تفتیش کے دوران دبئی پولیس کو پتہ چلا کہ نو افراد کا ایک گروپ چوری شدہ کریڈٹ کارڈ ڈیٹا بیچنے میں ملوث تھا۔
ملزمان کا تعلق عرب، ایشیائی اور افریقی ممالک سے ہے۔ ان میں ای کرائمز کے ماہرین بھی شامل ہیں۔ انہوں نے چوری شدہ کریڈٹ کارڈز سے 280 ہزار درہم سے زائد رقم چرائی تھی۔