کویت اردو نیوز : غزہ پر اسرائیل کی وحشیانہ بمباری جاری ہے جس میں اب تک 22 ہزار فلسطینی شہید اور 60 ہزار زخمی ہوچکے ہیں۔ شہید اور زخمی ہونے والوں میں 70 فیصد خواتین اور بچے ہیں۔
حماس کے حملوں میں 170 سے زائد اسرائیلی فوجی ہلاک اور متعدد زخمی ہو چکے ہیں۔
اسرائیلی فوجیوں کے خلاف جنگ میں حماس کے مجاہدین آئے روز بہادری کی لازوال داستانیں رقم کر رہے ہیں۔ سجدہ شہادت کے دوران فلسطینی نوجوان کی ویڈیو سوشل میڈیا پر وائرل ہو گئی ہے۔
اسرائیلی میڈیا نے نوجوان کو ڈرون کے ذریعے نشانہ بنائے جانے کی ویڈیو جاری کی۔ نوجوان کی شناخت تیسیر ابو تیمہ کے نام سے ہوئی ہے۔
ویڈیو میں دیکھا جا سکتا ہے کہ اسرائیلی فوجیوں کو نشانہ بنانے کے بعد نوجوان غزہ کی گلیوں میں اسلحہ لے کر بھاگ رہا ہے اور اسرائیلی ڈرون اس کا پیچھا کر رہا ہے۔ اچانک آگ بھڑک اٹھتی ہے اور ڈرون نے نوجوان پر میزائل فائر کیا جو اس کی پشت پر لگا ۔ تیسیر، شدید زخمی ہونے کے باوجود، لڑکھڑا کر واپس پناہ گاہ میں جانے کی کوشش کرتا ہے لیکن وہ اسے نہیں کر پاتا اور پھر ایک تباہ شدہ گھر کی دہلیز پر بیٹھ جاتا ہے۔
پھر تیسیر نے شہادت کی انگلی اٹھا کر اللہ کے حضور سجدہ کیا اور اسی حالت میں شہید ہو گئے۔ شہید نوجوان خان یونس کے علاقے میں حماس کے کتائب القسام کا کمانڈر تھا۔ ان کی نعت پڑھتے اور تلاوت کرتے ہوئے کئی ویڈیوز بھی سوشل میڈیا پر منظر عام پر آچکے ہیں۔
