کویت اردو نیوز ، 3 اکتوبر 2023: بھارت میں کرکٹ ورلڈ کپ کے دوران بدانتظامی اور ناقص انتظامات کا سلسلہ تھم نہ سکا۔
بھارت میں ہونے والے ورلڈ کپ کے انتظامات کے حوالے سے ہر روز ایک نیا مسئلہ کھڑا ہو رہا ہے جس سے عالمی میگا ایونٹ کا انعقاد خطرے میں پڑ گیا ہے۔
منگل کو اوپل حیدرآباد میں پاکستان اور آسٹریلیا کے درمیان وارم اپ میچ کے موقع پر راجیو گاندھی کرکٹ اسٹیڈیم کی سیٹوں کی تصاویر سوشل میڈیا پر منظر عام پر آئی ہیں جو گندے ہونے کی وجہ سے شائقین کے لیے موزوں نہیں ہیں۔
اسٹار اسپورٹس سے وابستہ کرکٹ تجزیہ کار وینکٹیش نے ٹوئٹر پر یہ تصاویر شیئر کیں جس سے اسٹیڈیم میں صفائی کے ناقص انتظامات کا انکشاف ہوا ہے۔ انہوں نے لکھا کہ اوپل اسٹیڈیم میں کچھ بھی نہیں بدلا اور تماشائیوں کے آرام کا خیال نہیں رکھا گیا۔
https://x.com/C4CRICVENKATESH/status/1709156900997083305?s=20
شائقین کی جانب سے میچ کے ٹکٹ نہ ملنے کی شکایات بھی آرہی ہیں اور غیر ملکی شائقین کو ویزے جاری کرنے کا معاملہ بھی اب تک حل نہیں ہوسکا۔
بھارتی میڈیا رپورٹس کے مطابق بھارتی کرکٹ بورڈ نے بھی وجہ بتائے بغیر افتتاحی تقریب منسوخ کر دی ہے اور اس فیصلے سے آئی سی سی کو بھی آگاہ کر دیا گیا ہے۔
یاد رہے کہ بھارت میں ہونے والے کرکٹ ورلڈ کپ میں شروع ہونے سے پہلے ہی بدانتظامی کے کیسز منظر عام پر آنا شروع ہو گئے تھے۔ پہلا شیڈول تاخیر کا شکار ہوا اور جب شیڈول جاری کیا گیا تو ہندو مذہبی تہوار نوراتری کی وجہ سے سکیورٹی مسائل کی وجہ سے کئی میچوں کو ری شیڈول کر دیا گیا۔
بھارتی حکومت کو سیکیورٹی خدشات کے باعث پاکستان اور نیوزی لینڈ کے درمیان وارم اپ میچ بند دروازوں کے پیچھے کرانا پڑا۔ میگا ایونٹ سے قبل گزشتہ ماہ کولکتہ کے ایڈن گارڈنز میں بھی آگ لگنے کا واقعہ پیش آیا تھا جس کے نتیجے میں کھلاڑیوں کا سامان جل کر راکھ ہوگیا تھا جب کہ اسی گراؤنڈ میں پاکستان اور انگلینڈ کے درمیان ورلڈ کپ کا میچ بھی شیڈول ہے۔
