کویت اردو نیوز 16 مارچ: برطانیہ کے معروف اور امیر ترین تاجر الفریڈ ولیم بیسٹ عرف ایلفی بیسٹ نے اسلام قبول کرلیا۔
غیر ملکی خبر رساں ادارے کے مطابق موبائل ہوم پارک کمپنی وائلڈ کرسٹ پارکس کے موجودہ چیئرمین اور دنیا کے امیر ترین افراد میں سے ایک الفریڈ ولیم بیسٹ بھی کلمہ پڑھ کر دائرہ اسلام میں داخل ہوگئے۔
کچھ ماہ قبل ایلفی بیسٹ کی جانب سے مسجد سے ایک تصویر شیئر کی گئی تھی جس کا کیپشن درج تھا کہ جسے اللہ ہدایت دے اسے کوئی گمراہ نہیں کرسکتا اور اللہ جسے گمراہ کردے اسے کوئی ہدایت نہیں دے سکتا۔ 2019 میں سنڈے ٹائمز یو نے ایلفی کو برطانیہ کے امیر افراد کی فہرست میں شامل کیا تھا۔
وائلڈ کرسٹ پارکس کمپنی کے چیئرمین، برطانوی کروڑ پتی الفریڈ ولیم بیسٹ کا شمار برطانیہ کے امیر ترین لوگوں میں ہوتا ہے۔ انہوں نے سوشل میڈیا کے ذریعے یہ خبر دے کر اپنے پیروکاروں کو حیران کر دیا کہ انہوں نے اسلام قبول کر لیا ہے۔
اپنی ایک انسٹاگرام پوسٹ میں، انہوں نے اپنے نئے رینجر کا ایک ویڈیو کلپ شیئر کیا، جس میں وہ اپنی نئی گاڑی کے لیے کافی پر پرجوش نظر آ رہے ہیں۔ ویڈیو کلپ شیئر کرتے ہوئے انہوں نے یہ بھی لکھا کہ "الحمدللہ تمام تعریفیں اللہ کے لیے ہیں”۔
الفی بیسٹ جونیئر نے اپنی تازہ ترین انسٹاگرام پوسٹ میں پوڈ کاسٹ کا ایک ویڈیو کلپ شیئر کیا۔ انہیں دیکھا جا سکتا ہے کہ میزبان کے سونا پہننے کے سوال کے جواب میں، انہوں نے کہا کہ ’’بالکل، میں نے سونا پہننا چھوڑ دیا ہے کیونکہ میں ایک اچھا مسلمان بننا چاہتا ہوں۔‘‘
برطانوی کروڑ پتی نے کہا کہ میں نے اپنی تمام سونے کی گھڑیاں بیچ دی ہیں اور اپنی کلائی کی طرف اشارہ کرتے ہوئے کہا کہ میں نے سٹین لیس سٹیل کی گھڑی پہن رکھی ہے جو کہ حلال ہے۔
یہاں یہ بات بھی قابل ذکر ہے کہ شرعی احکام کے مطابق اسلام میں مردوں کو سونے کے زیورات پہننے کی اجازت نہیں ہے۔ واضح رہے کہ ایلفی نے 1990میں ایک فون شاپ سے اپنے کاروبار کا آغاز کیا تھا اور آج وہ برطانیہ کے امیر افراد میں شمار ہوتے ہیں۔