کویت اردو نیوز،14اگست: امریکی ریاست الینوائے میں ڈیری مصنوعات سے متعلق ایک سالانہ میلے میں مکھن سے بنا 800 پاؤنڈ وزنی گائے کا مجسمہ عوام کی دلچسپی کا مرکز بنا رہا۔ میلے میں مکھن سے بنے گائے کے اس مجسمے کی نقاب کشائی الینوائے ریاست کے گورنر نے کی۔
اس میلے کا مقصد ڈیری سے متعلق امریکی عوام میں شعور اور دلچسپی پیدا کرنا بھی ہے
مکھن سے بنے گائے کے اس مجسمے کی نقاب کشائی کی تقریب ہر سال منعقد کی جاتی ہے، الینوائے کے گورنر جے بی پرٹزکر نے شیشے کے تابوت سے پردہ ہٹا کر مکھن سے بنے گائے کے مجسمے کا باقاعدہ افتتاح کیا۔
اس سال مکھن سے گائے کے مجسمے کی تیاری ریاست الینوائے ڈیری فارمر لوریلی شولٹز کی جانب سے تیار کیا گیا ہے جس میں ایک دودھ دینے والی گائے کو دکھایا گیا ہے۔
جب کے اس کے ساتھ ہی ایک دوسرا انسانی مجسمہ بھی رکھا گیا ہے جو شلٹز کی پوتی لوسی کا ہے اسے بھی مکھن ہی سے تیار کیا گیا ہے، اس انسانی مجسمے میں لوسی کو گائے کے ایک بچھڑے کی دیکھ بھال کرتے ہوئے دکھایا گیا ہے۔
ذرائع ابلاغ کی رپورٹس کے مطابق 2023 کے مکھن سے بنے گائے کے اس مجسمے کو آرٹسٹ سارہ پریٹ نے بنایا ہے۔
پریٹ نے ایک پریس ریلیز میں کہا کہ ’ ہر سال مکھن سے گائے کا مجسمہ بنانے کا مقصد الینوائے کے کسان خاندانوں کی عزت وقار کو بڑھانا اور ان کی حوصلہ افزائی کرنا ہے۔
ان کا کہنا ہے کہ اس سال یہ اعزاز میرے حصّے میں آیا ہے، میری اپنی بیٹی گریس نے لوسی اور اس کے بچھڑے کا اضافی مجسمہ بنایا۔
ان کا کہنا ہے کہ الینوائے کے فارمز ہمارے دل میں ہیں اور ہم ان کا بے حد احترام کرتے ہیں اور مجھے خوشی ہے کہ اس احترام میں اب میری 19 سالہ بیٹی بھی شامل ہو گئی ہے۔
الینوائے اسٹیٹ میلہ جمعرات کو شروع ہوا جو 20 اگست تک جاری رہے گا۔اس عرصے کے دوران میلہ کے شرکا کے لیے مکھن کے بنے مجسمے سب کی دلچسپی کا باعث بنے رہیں گے۔
