کویت اردو نیوز ، 1اکتوبر 2023 : اسپین کے ایک نائٹ کلب میں سالگرہ کی تقریب کے دوران اچانک آگ بھڑک اٹھی ، جس نے پورے بار کو لپیٹ میں لے لیا اور شدید جھلسنے اور دھویں سے دم گھٹنے سے 13 افراد ہلاک ہوگئے۔
عالمی خبر رساں ادارے کے مطابق اسپین کے ایک نائٹ کلب میں سالگرہ کا جشن منایا جا رہا تھا اور رات بھر موسیقی اور شراب نوشی کا سلسلہ جاری رہا کہ اچانک آگ لگ گئی۔
فائر بریگیڈ کے ترجمان نے میڈیا کو بتایا کہ آگ نائٹ کلب کی اوپری منزل پر لگی جس سے پوری عمارت کو نقصان پہنچا ہے جو کسی بھی وقت گر سکتی ہے۔
ریسکیو ادارے نے امدادی کارروائیوں کے دوران ایک درجن سے زائد افراد کو اسپتال منتقل کیا ، جہاں 13 افراد کے جاں بحق ہونے کی تصدیق ہوگئی ہے جب کہ 4 افراد کی حالت تشویشناک بتائی جاتی ہے۔
جاں بحق ہونے والوں میں خواتین اور بچے بھی شامل ہیں۔ واقعے کی تحقیقات کے لیے انکوائری کمیٹی تشکیل دے دی گئی۔
آگ میں جانی نقصان پر دکھ کا اظہار کرتے ہوئے میئر نے شہر بھر میں 3 روزہ سرکاری سوگ کا اعلان کیا ہے۔