کویت اردو نیوز : چین نے دنیا کے چھ ممالک کے شہریوں کو بغیر ویزے کے ملک میں داخلے کی اجازت دے دی ہے۔
خبر رساں ادارے روئٹرز کے مطابق چین نے سیاحت کو فروغ دینے کے لیے چھ ممالک کے شہریوں کو عارضی طور پر ویزا فری انٹری دینے کا فیصلہ کیا ہے۔
چینی وزارت خارجہ کے ترجمان نے کہا کہ رواں سال یکم دسمبر سے اگلے سال 30 نومبر تک جرمنی، فرانس، اٹلی، ہالینڈ، اسپین ، ملائیشیا کے شہریوں کو ویزا فری انٹری دینے کا فیصلہ کیا گیا ہے۔
ترجمان نے واضح کیا کہ ان ممالک کے شہری کاروباری سرگرمیوں، سیاحت اور اپنے رشتہ داروں سے ملنے کیلیے بغیر ویزا کے چین میں داخل ہو سکیں گے اور 15 دن تک قیام کر سکیں گے۔
کورونا وائرس کے پھیلاؤ کے خاتمے کے بعد چین سیاحت کے فروغ کے لیے اقدامات کر رہا ہے جس کا مقصد ملک میں سیاحت کو فروغ دینا ہے۔
حال ہی میں پیو ریسرچ سینٹر کے ایک سروے سے پتا چلا ہے کہ دنیا کے 24 ممالک میں 67 فیصد لوگ چین کے بارے میں منفی سوچ رکھتے ہیں۔
چین میں جرمنی کی سفیر پیٹریشیا فیور نے ویزا فری انٹری کی پالیسی کو سراہتے ہوئے کہا کہ مذکورہ فیصلے سے جرمن شہریوں کو چین کا سفر کرنے میں کافی سہولت ملے گی۔
واضح رہے کہ چین گزشتہ کئی سالوں سے یورپ اور دیگر مغربی ممالک کے ساتھ اپنے سفارتی تعلقات کو بہتر بنانے کی کوشش کر رہا ہے۔