کویت اردو نیوز : انٹرنیشنل کرکٹ کونسل (آئی سی سی) ورلڈ کپ ٹرافی پر قدم رکھنے پر آسٹریلوی کرکٹ ٹیم کے آل راؤنڈر اور اسٹار کھلاڑی مچل مارش کے خلاف بھارتی دارالحکومت نئی دہلی میں مقدمہ درج کر لیا گیا ہے۔
19 نومبر کو احمد آباد میں ہونے والے ورلڈ کپ کے فائنل میں آسٹریلیا نے بھارت کو شکست دے کر چھٹی بار ٹائٹل اپنے نام کیا تھا، جس کے بعد آسٹریلوی ٹیم کے آل راؤنڈر مچل مارش کی ایک تصویر سوشل میڈیا پر وائرل ہوئی جس میں وہ اپنے پیروں کو ورلڈ کپ ٹرافی پر رکھے ہوئے ہیں ۔
بھارتی شہر علی گڑھ سے تعلق رکھنے والے سماجی کارکن نے آسٹریلوی کرکٹر مچل مارش کے خلاف ایف آئی آر درج کرائی ہے اور اس کی ایک کاپی بھارتی وزیر اعظم نریندر مودی کو بھجوا کر مطالبہ کیا ہے کہ مچل مارش پر بھارت میں کرکٹ کھیلنے پر پابندی عائد کی جائے۔
دوسری جانب بالی ووڈ اداکارہ اروشی روٹیلا نے ورلڈ کپ ٹرافی کے بعد آسٹریلوی کرکٹر مچل مارش پر ناپسندیدگی کا اظہار کرتے ہوئے مارش کو تنقید کا نشانہ بنایا۔
اروشی روٹیلا نے اپنی انسٹاگرام اسٹوری پر مچل مارش کی تصویر پوسٹ کی اور مچل مارش کو ٹیگ کیا اور لکھا، مچل مارش بھائی، ورلڈ کپ ٹرافی کے لیے کچھ تو احترام دکھائیں۔
