کویت اردو نیوز : اگر کسی شخص میں کینسر کی تشخیص ہو جائے تو اس کے مکمل صحت یاب ہونے کا امکان ہے لیکن صرف اس صورت میں جب اس کی جلد تشخیص ہو جائے، جب کہ اس مرض کا علاج بہت تکلیف دہ ہو سکتا ہے۔
کینسر کو دنیا میں موت کی دوسری بڑی وجہ سمجھا جاتا ہے اور اس کی کچھ اقسام سب سے زیادہ اموات کا سبب بنتی ہیں۔
لیکن اچھی بات یہ ہے کہ چند آسان عادات کو اپنا کر کینسر سے بچا جا سکتا ہے۔ یہ بات برطانیہ میں ہونے والی ایک طبی تحقیق میں سامنے آئی ہے۔
نیو کیسل یونیورسٹی کی ایک تحقیق میں بتایا گیا ہے کہ 7 عام عادات کو اپنانے سے 12 قسم کے کینسر ہونے کے خطرے کو نمایاں طور پر کم کیا جا سکتا ہے۔
تحقیق میں بتایا گیا کہ جسمانی سرگرمی، پھلوں، سبزیوں، اناج اور بیجوں سے بھرپور غذا کا استعمال، فاسٹ فوڈ اور زیادہ چکنائی والے پراسیس فوڈز کا کم سے کم استعمال، سرخ اور پراسیسڈ گوشت کا محدود استعمال، میٹھے مشروبات کا کم استعمال، الکحل سے پرہیز ، صحت مند جسمانی وزن کو برقرار رکھنامختلف قسم کے کینسر ہونے کا خطرہ 30 فیصد تک کم ہو جاتا ہے۔
اس تحقیق میں 90 ہزار سے زائد افراد کو شامل کیا گیا۔ اس تحقیق میں اس بات کا تجزیہ کیا گیا کہ کس طرح ورلڈ کینسر ریسرچ فنڈ کی طرف سے تجویز کردہ احتیاطی تدابیر اس بیماری میں مبتلا ہونے کے خطرے کو کم کرتی ہیں۔
مطالعہ کے دوران، افراد کی خوراک، ورزش اور جسمانی وزن کی نگرانی کی گئی اور ہر فرد کا اندازہ لگایا گیا کہ وہ ان ہدایات پر کس حد تک عمل کرتے ہیں۔
اسی طرح یہ بھی دیکھا گیا کہ 8 سال کے دوران کتنے لوگوں میں کینسر کی تشخیص ہوئی۔
نتائج سے معلوم ہوا کہ 7 عادات میں سے جتنی زیادہ اپنائی جائیں، کینسر کا خطرہ اتنا ہی کم ہوتا ہے۔ درحقیقت ہر عادت کو اپنانے سے کینسر ہونے کا خطرہ 7 فیصد تک کم ہو سکتا ہے۔
تحقیق میں بتایا گیا ہے کہ ان عادات کو اپنانے سے 12 قسم کے کینسر سے بچاؤ میں مدد ملتی ہے ، جن میں پتے ، ovary ،جگر، گردہ، غذائی نالی، لبلبہ، مثانہ، چھاتی، پھیپھڑے، مثانہ اور آنت کا کینسر شامل ہیں۔
تاہم تحقیق میں یہ بھی معلوم ہوا کہ بعض اقسام کے کینسر جیسے کہ سر اور گلے کے کینسر کا خطرہ کسی حد تک بڑھ جاتا ہے۔
محققین کے مطابق ابھی تک یہ واضح نہیں ہے کہ ان عادات کو اپنانے سے یہ خطرہ کیوں بڑھ جاتا ہے تاہم اس بات کا زیادہ امکان ہے کہ سر اور گلے کا کینسر طرز زندگی کے عوامل کی وجہ سے نہیں ہوتا۔
مطالعہ کے نتائج بی ایم سی میڈیسن میں شائع ہوئے تھے۔
