کویت اردو نیوز ، 18 اکتوبر 2023: فیفا ورلڈ کپ میں تاریخ رقم کرنے والی مراکش کی ٹیم کے کئی نامور کھلاڑیوں کو غزہ کے مظلوم فلسطینیوں کی حمایت پر مغربی میڈیا کی جانب سے ایک بار پھر تنقید کا نشانہ بنایا گیا۔
اٹلس لائنز کے کھلاڑی اور بائرن میونخ کے ڈیفینڈر نصیر مزراوی نے اپنے انسٹاگرام اسٹوری پر ایک ویڈیو شیئر کی ہے جس میں انہوں نے نئی اسرائیلی جنگ کا سامنا کرنے والے فلسطینیوں کے لیے "فتح” کی خواہش کی ہے۔
مراکش کے قومی کھلاڑی نے ایک مختصر کلپ شیئر کیا جس میں لہراتے ہوئے فلسطینی پرچم کی تصویر کے ساتھ دعا بھی کی گئی تھی کہ "خدا فلسطین میں ہمارے مظلوم بھائیوں کو جیتنے میں مدد دے، خدا شہداء پر رحم کرے۔” اور ان کے زخمیوں کو شفا بخشے ۔
جرمن فٹ بال کلب نے باضابطہ طور پر فلسطینیوں کے حق میں آواز اٹھانے پر بائرن میونخ سے وضاحت کی درخواست کی ہے جب کہ جرمن میڈیا نے لکھا ہے کہ ’دہشت گردی کی وکالت؟ ناقابل برداشت!” اگر مزراوی ان معاملات سے دورنہیں رہتاتو وہ لیگ میں نہیں کھیل سکتا۔
دوسری جانب دائیں بازو کی تنظیم کرسچن ڈیموکریٹک یونین کے ارکان نے فٹبالر کو ٹیم اور ملک سے نکالنے کا مطالبہ کیا ہے۔
واضح رہے کہ گذشتہ روز غزہ کے اسپتال پر اسرائیلی فوج کی بمباری میں 500 سے زائد فلسطینی شہید اور سینکڑوں زخمی ہوچکے ہیں۔
