کویت اردو نیوز : بھارت کے مقبول ترین گیم شو ‘کون بنے گا کروڑ پتی’ میں 14 سالہ لڑکے نے ایک کروڑ روپے جیت کر ریکارڈ قائم کر دیا ہے۔
آٹھویں جماعت کے طالب علم مانک گیم شو ‘کون بنے گا کروڑ پتی’ میں ایک کروڑ روپے جیتنے والے سب سے کم عمر شخص بن گئے ہیں۔
واضح رہے کہ امیتابھ بچن کی میزبانی میں ہونے والے اس گیم شو کا 15 واں ایڈیشن رواں سال ٹیلی ویژن پر نشر کیا جا رہا ہے۔
میانک کا تعلق بھارتی ریاست ہریانہ سے ہے۔ سوشل میڈیا پر وائرل ہونے والے پروگرام کے ٹریلر میں وہ امیتابھ بچن سے کہتے ہیں کہ ‘صرف ایک چیز جو کہیں بھی فرق کر سکتی ہے وہ ہے آپ کا علم۔’
شو کے دوران امیتابھ بچن کے ایک سوال کے جواب میں میانک کے والد نے کہا کہ ان کے اسکول کے اساتذہ بھی کہتے ہیں کہ یہ لڑکا ہمیشہ ہم سے دو قدم آگے رہتا ہے۔
پروگرام کے دوران اس 14 سالہ لڑکے نے 15 سوالوں کے صحیح جواب دیے اور ایک کروڑ روپے جیتے۔ اس کے بعد جب امیتابھ بچن نے ان سے 7.5 کروڑ روپے کا 16واں سوال پوچھا تو میانک نے معذرت کرتے ہوئے 1 کروڑ روپے میں گیم ختم کرنے کا فیصلہ کیا۔
میانک نے پروگرام کے اختتام پر کہا کہ وہ خود کو خوش قسمت سمجھتے ہیں کیونکہ انہیں ‘کون بنے گا کروڑ پتی’ میں اپنے علم کا مظاہرہ کرنے کا موقع ملا۔
‘کون بنے گا کروڑ پتی’ ہندوستان کے مقبول ترین شوز میں سے ایک ہے جو 2000 سے چل رہا ہے۔
