کویت اردو نیوز ، 9 اکتوبر 2023: بھارتی اداکارہ سوارا بھاسکر نے اسرائیل کی حمایت کرنے والوں پر برہمی کا اظہار کرتے ہوئے انہیں منافق قرار دے دیا۔
فلسطین کی مزاحمتی تنظیم اور غزہ کی حکمراں جماعت حماس نے ہفتے کے روز اسرائیل پر اچانک حملہ کر کے اسرائیل سمیت پوری دنیا کو حیران کر دیا ہے۔ ہفتے کے روز شروع ہونے والی لڑائی اتوار کو سارا دن جاری رہی۔
اسرائیل پر غیر متوقع حملے کے بعد حزب اللہ لبنان سے بھی صہیونی ریاست کو نشانہ بنا رہی ہے۔ حماس کے جنگجو اب بھی اسرائیل کے زیرقبضہ علاقوں کےاندرموجود ہیں جہاں اکثر مقامات پران کی اسرائیلی فوج سےجھڑپیں ہورہی ہیں
حماس کے حملوں کے بعد امریکہ اور بھارت اسرائیل کے حمایتی بن کر سامنے آئے ہیں۔ .
ایسے میں گوہر خان کے بعد اب بھارتی اداکارہ سوارا بھاسکر نے بھی اسرائیل کے حامیوں کو کرارا جواب دیا ہے، انہوں نے اپنے انسٹاگرام ہینڈل پر ایک اسٹوری پوسٹ کی۔
سوارا بھاسکر نے اپنی انسٹاگرام سٹوری میں اسرائیل کے حامیوں کو مخاطب کرتے ہوئے کہا کہ جب اسرائیل گزشتہ کئی سالوں سے غزہ اور اس کے شہریوں، اسکولوں اور اسپتالوں پر بمباری کر رہا تھا تو آپ لوگ کہاں تھے؟
بھارتی اداکارہ نے انتہائی غصے کے انداز میں کہا کہ ’اگر آپ فلسطینیوں پر اسرائیل کے نہ ختم ہونے والے مظالم، فلسطینیوں کے گھروں پر جبری قبضے، فلسطینی بچوں، خواتین اور نوجوانوں کے قتل، کئی دہائیوں سے جاری ناکہ بندی اور بمباری پر چپ تھے۔ اور اگر آپ نے خوف محسوس نہیں کیا تواسرائیل پر حماس کے حملوں پر آپ کا "دکھ، صدمہ اور افسوس مجھے منافقانہ لگتا ہے۔”
اس سے قبل بھارتی اداکارہ گوہر خان نے کہا تھا کہ ‘گزشتہ کئی سالوں سے فلسطین کے ظلم و ستم سے اندھی ہونے والی دنیا کی بینائی اب لوٹ آئی ہے۔
واضح رہے کہ بین الاقوامی خبر رساں ادارے کے مطابق حماس کے اچانک حملے کے بعد سے اسرائیلی فوج سنبھل نہیں پائی ہے۔ مختلف جھڑپوں میں ہلاک ہونے والے اسرائیلیوں کی تعداد 700 سے تجاوز کر گئی جن میں سینکڑوں فوجی اور پولیس اہلکار شامل ہیں۔
دوسری جانب اسرائیلی فوج نے بزدلانہ کارروائی کرتے ہوئے غزہ میں حماس کے کمانڈروں کے گھروں پر رات بھر بمباری کی۔ ہر طرف تباہی کے مناظر ہیں۔ ان حملوں میں بچوں سمیت 413 فلسطینی شہید ہو چکے ہیں۔
